每日が日曜日 (已結業)

見到大埔有新拉麵特登揸車過嚟食。今晚我第一個客，基本上叫你坐低之後淨係擺低個落單QR code就走。唔緊要，我嚟食嘢嘅啫，最緊要好食。叫咗碗黑蒜油豚骨拉麵，一食落去以為自己中咗肺炎冇味覺，得啲豬油味完全冇鹹味嘅？再食多半嚿筍，都係冇味。唔通呢啲先至係正宗拉麵我唔識食？真係從來未試過，諗咗陣都係頂唔順細細聲問 waitress 妹妹個湯係咪冇落鹽？（嗰陣有第二枱客入咗嚟，費事大聲佢尷尬) 點知阿妹喺廚房大大聲話個客問係咪冇落鹽😂 好快師傅出嚟小黑面攞返碗麵走話再整過，咁我就食住小食雞皮餃子等，呢個小食 ok 嘅。好快上過另外一碗，正常，顏色深咗，好明顯第一碗佢完全唔記得落醬油，師傅擺低嗰陣講咗句：唔好意思呢碗應該 ok 㗎啦。講返碗麵，好一般，湯唔夠，筍真係冇味。叉燒正常表現刀功嗰隻，蛋正常。冇下次。