十二味麻辣香鍋 (已結業)

跟思羽初次約會，難得朋友仔食得辣，而且我一直都好想食台灣名菜十二味淡水龍蝦仔，搵到黎尖沙咀。第一次約會都遲到？您想死定喇。人家尊登搵到黎依度為左食麻辣淡水龍蝦仔，點知無得賣囉，咁我洗鬼幫襯您咩！全晚冷清清，半數食客都係操國語，連侍應阿姐都係囉，廣東話都唔識講，想點？地方坐得幾舒服開揚，露天位寧靜又空氣流通。奈何食物選擇不多，似小食送酒 feel。先黎個前菜蒜拍黃瓜，淨係鹽同蒜，簡單清新爽脆又幾好味喎。麻辣香鍋大辣，朋友仔想挑戰大辣香辣鍋，當然無問題啦！唔係好辣乍喎，不過我都成頭濕晒喇！大量香料香菜，夠香口。睇黎聽日一定副作用強勁。帶子、海蝦、田雞、牛柏葉、木耳、窩筍，點知係牛柏葉最好味囉！窩筍都好，帶子同蝦都麻麻，雪藏無鮮味無味道，水味濃。田雞肉好有咬口，但滑溜鮮味欠棒，都係雪藏貨。花椒臘肉炒飯，臘肉油脂勁香，粒粒香口臘肉夠嚥韌，咸香四溢，雖然油潤一點，不過撈上飽滿飯粒真心好味。