蟹膳 (已搬遷) 新店位置

Item: 蟹膳
Rating: 4
Author: 奧志雷

Kanizen

153 食評

味道

環境

服務

衛生

抵食

14433

灣仔

$801以上

日本菜海鮮蟹店

117

奧志雷

等級4

2.1K

朋友仔提過蟹膳好正，今晚專程過海搵食，試我人生第一隻毛蟹！舖頭非常隱秘，係正街尾角落頭，黑媽媽又無招牌又無門牌勁搞笑，按制自動門打開 ﹗入口處有兩大缸鱈場蟹比食客欣賞、拍照及娛樂，睇落真係好似缸色蜘蛛啊！睇睇 menu 先，某些價錢真係見到都面青青呀 ﹗雪藏蟹係香港好易就食得到，但活既游水毛蟹、游水鱈場蟹唯有專門店喇 ﹗到底點解細細隻500gms毛蟹要成千銀咁經貴呢？我真係唔明，就由您開始啦！雖然主打係蟹，但都有好多不同小食，我好想試晒去呀 ﹗朋友仔完來唔食海膽架，但成個餐主要配菜係海膽呢，師傅話會將所有海膽加到我既菜式上面，多謝晒呀 ﹗哈哈哈 ﹗Order 左個每位 HKD1480 既套餐，7 道菜加 1 甜品，靜心等耐。食客唔算太多，只係半場滿，見到 99% 都係食套餐，只有附既一對男女叫左整隻鱈場蟹嘆，仲食唔晒要打包添。心諗食唔晒比我麻，我一定幫到您，呵呵 ﹗客食客都係圍住 U 形火鍋枱坐，打開枱面就會見到有個電磁爐作蟹鍋之用。烤枝豆，免費餐前小食，點解唔係任食架？枝豆脆口又濕潤，帶點燒烤味好特別。海膽鱈場蟹腳刺身，依度足足有兩份海膽架，因為朋友仔唔食海膽，所以自動轉移。好味到難以形容！唔怪得咁貴啦，物有所值既。活鱈場蟹腳刺生撈海膽、魚籽、金箔，極度經貴！雪白既鱈場蟹肉彈牙濕潤又滑溜溜，淡淡清甜帶少許海水味道，撈埋即開新鮮海膽，既甜又清新，再加上魚料既甘香，多層次既味道夾都不得了，完全唔想吞落肚呢 ﹗海膽鱈場蟹腳刺身，兩隻海膽堅係勁肥美又勁多肉呀，食極都仲有，鮮甜可口又彈牙，大滿足 ﹗連伴碟既子薑同日本紅蔥頭都唔放過，全部食晒，正呀 ﹗海膽鱈場蟹腳刺身走海膽，師傅專登為朋友仔做既鱈場蟹刺生，特別比多少少肉，真細心，讚 ﹗免治蟹棒，燒免治蟹棒好香口，燒過既蟹肉味道特別香甜，深橙黃色既蛋黃黃味超濃，撈埋一齊食仲有少少似阿媽整既客家蘿蔔茶果餡料既味道！好好味 ﹗配菜、生蛋黃依舊一滴不漏比我倒晒落肚。海膽蒸蛋，繼續海膽，正呀 ﹗海膽飛魚籽日式蒸蛋非常出色，色香味俱全！一啖過魚籽、蒸蛋、海膽同時間啪入口，咸甜鮮、滑腍脆撞埋一齊，好味道，爽爆 ﹗燒海膽鱈場蟹腳，好粗、好大條呀！啖啖肉，加上勁多燒得鮮甜海膽！講多無謂！殺呀！蟹肉十分彈牙，天然海水咸香，烤得香口，好食到震 ﹗太好味，我想要多條腿啊 ﹗海膽毛蟹肉黃蛋天婦羅，個賣相靚到藝術品一樣，似皇冠又似盆景。點睇都唔似天婦羅囉，估您唔到。蛋黃做天婦羅？估唔到有咁既菜式，外層薄薄脆口雲一般既天婦羅，包住裡面暖暖香濃蛋黃，超讚！食半隻，留半隻撈毛蟹肉食，味道亙相配合，毛蟹肉味道較淡加上蛋黃味道剛好。連埋金箔魚籽海膽，實在太過份、太奢侈喇！好好味，好幸福啊！我可唔可以食多份呀？***鱈場蟹毛蟹什菌野菜火鍋！唔洗講梗係堅好味啦！雖然只係普通日本味淋湯底，但烚完豆腐、紹菜、椰菜、金菇、本菇、冬菇、大蔥、魔芋絲、鮮蟹後，湯底變得清甜好味！魔芋絲撈豉油都已經非常好食。有款貌似皇帝菜既野菜唔知咩黎呢？但食落爽口清甜，並無皇帝菜既辛辣喎，Good。留返兩個爆膏蟹蓋備用，一陣用黎餚粥食。我都係覺得鱈場蟹好食過毛蟹好多，因為蟹肉鮮甜又味道濃郁，質感結實彈彈的，大舊又啖啖肉的。而毛蟹肉較清淡、鮮味、較碎，不過蟹膏勁多，軟棉蟹膏鋪滿成個蟹蓋架。鱈場蟹毛蟹什菌野菜火鍋，日式毛蟹膏鱈長蟹膏蛋黃粥，正呀！係用剛才烚蟹、烚什菌蔬菜既上湯煮架。用兩個爆膏蟹蓋加蛋黃煮日本粥，棉滑味美，味道特別豐富香甜，無得輸 ﹗好食到停唔到口，碗都機乎舔埋！蟹肉湯餃子，雖然普通一點，不過餃皮滑溜、餡料清甜，配上淡豉油都好好食，感覺好似食緊雲吞咁囉！普通甜品，芝麻雪糕及柚子雪糕。