華星冰室 (克街)

營業中

休息中

今晚去飲，大家都知道七時恭候，唔知幾點先開席，為免搞到半夜都未食得，所以就食少少野打打底，龍蝦伊麵實在唔太啱本人胃口。行過華星冰室，咁就正好食件西多三文治什麼也好，至少唔會餓Q 死！今日唔知做咩忽然想食西多，仲要咖央餡！楓糖漿係另上的，炸得金黃的西多士，加埋半溶化鮮油，西多的熱力令到牛油慢慢溶化，不如你就咁殺左我算啦。外表就好靚仔，切開見到內餡唔係好多咖央醬，有啲失望添，不過多士好脆又無話滴晒油淋晒咁，整體都叫唔錯！食完滚水淥腳咁走，俾錢時聽到侍應好大聲叫“喂！拎齊野呀” ，（即係嗰隻好粗豪茶餐廳聲），原來我漏左成袋野無拎到，仲要喺放左喺枱面，多謝佢咁大聲提我，否則我應該會直出門口，之後當然又係揾餐勁嘅，真係好大聲但服務分數暗暗加左不少。