影片
更多
2021-10-31
878 瀏覽
最近試左呢間位於銅鑼灣登龍街既日本菜-魚鮮生。開頭入去時覺得間舖好細，點知原來2樓係勁大囉~~~~仲好靚添我發現佢個午市套餐好抵食！真心誠意推薦佢個HK$88「吉列鰻魚白烏冬」+ 「拖羅丼」！但我想先介紹一下呢度有得食日本生蠔！【新鮮生蠔】HK$68/隻我地每人點左一隻試。一來到，一隻好肥美，一隻好瘦。食落肥美個隻好鮮甜多汁，勁厚肉，好甜好滑，100分！但係好瘦果隻生蠔，無咩腦汁，比較扁，唔太滿足。食生蠔真係好睇運氣，但兩隻都有少少蠔殼碎，洗得需要再仔細D。【豪華壽司拼盤】HK$388飯前想食少少野開胃先，所以我地兩個人SHARE一份壽司拼盤。總共有十款壽司，每款壽司都好有誠意，幾乎有OMAKASE嘅水準！記住提提大家，每食一件壽司之後都飲返一口茶，沖一沖洗口腔，先再迎接下一件。由左至右：牡丹蝦壽司，連頭奉上，蝦肉彈牙，蝦頭蝦膏都鮮甜到不得了！大拖羅壽司，好肥美甘香，夾埋醋米飯食真係無得頂！吞拿魚赤身壽司，軟滑口感，味道較淡，建議中段食。秋刀魚壽司，我覺得個味好特別，其他魚係食唔到，好濃好鮮，我好鍾意，去日本時都必定要食！建議中段食。金目鯛壽司，好甘香魚皮油脂，較清淡，建議最先食。赤貝
開頭入去時覺得間舖好細，點知原來2樓係勁大囉~~~~仲好靚添
我發現佢個午市套餐好抵食！真心誠意推薦佢個HK$88「吉列鰻魚白烏冬」+ 「拖羅丼」！
但我想先介紹一下呢度有得食日本生蠔！
【新鮮生蠔】HK$68/隻
我地每人點左一隻試。
一來到，一隻好肥美，一隻好瘦。
食落肥美個隻好鮮甜多汁，勁厚肉，好甜好滑，100分！
但係好瘦果隻生蠔，無咩腦汁，比較扁，唔太滿足。
食生蠔真係好睇運氣，但兩隻都有少少蠔殼碎，洗得需要再仔細D。
【豪華壽司拼盤】HK$388
飯前想食少少野開胃先，所以我地兩個人SHARE一份壽司拼盤。
總共有十款壽司，每款壽司都好有誠意，幾乎有OMAKASE嘅水準！
記住提提大家，每食一件壽司之後都飲返一口茶，沖一沖洗口腔，先再迎接下一件。
由左至右：
牡丹蝦壽司，連頭奉上，蝦肉彈牙，蝦頭蝦膏都鮮甜到不得了！
大拖羅壽司，好肥美甘香，夾埋醋米飯食真係無得頂！
吞拿魚赤身壽司，軟滑口感，味道較淡，建議中段食。
秋刀魚壽司，我覺得個味好特別，其他魚係食唔到，好濃好鮮，我好鍾意，去日本時都必定要食！建議中段食。
金目鯛壽司，好甘香魚皮油脂，較清淡，建議最先食。
赤貝壽司，彈牙爽甜，好新鮮，但味道較淡，建議最先食。
帶子壽司加上紫蘇花，鮮甜之餘仲加左花香，有層次。
三文魚籽壽司，由於影相影耐左，紫菜都腍哂，但三文魚籽色澤通透，新鮮程度呃唔到人，真係好好味好新鮮！建議較後食。
海膽壽司，呢個真係不得了，個海膽又濃又鮮甜真係不得了，完全唔會腥唔會臭，無野好講，極品，好食，建議最後食。
左口魚壽司，火炙過，好香魚油，但油膩感好重，唔夠清爽，建議中段食。
主食之外，餐點都配一客昆布蜆肉熱湯，同出面有啲好咸既麵豉湯唔同，我個人好喜歡呢度既湯，同埋刺身壽司類餐點，會有希靈魚剌身做前菜，好鮮甜。
醬油都唔係死咸醬油，選材唔錯，芥辣食得出係新鮮山葵磨製，好好味好香，大大啖食都唔會攻鼻。
因為化學wasabi會好攻鼻，我個人好驚見到化學wasabi。
【拖羅丼】$168 (午市套餐附麵豉湯及前菜)
拖羅丼價錢睇落有少少貴，但原來上檯時，上面有5片厚切嘅大拖羅！再伴以三文魚籽及吞拿魚蓉砌成既小山，中間有一隻生雞蛋，營造出火山嘅感覺！
大拖羅極鮮甜！好肥美！咬落滿滿油脂！
整個丼飯搭配得好好，蛋液拌落個飯度有滿滿幸福感，飯係丼既靈魂，而魚鮮生係日本米使用店，呢度既米飯好有咬口彈牙，真心高質，對得住個價錢。
【吉列鰻魚白咖哩手工烏冬麵】HK$88 (午市套餐附麵豉湯及前菜)
市面上好少見到有吉列鰻魚！必點！
食落勁驚喜！
酥脆表皮裹著超厚嫩嘅鰻魚，塊鰻魚絕對唔係超市貨嘅水準！
你可以睇到佢有一絲絲肉質分明，好厚好彈牙，好多油份！
雖然佢係吉列炸但一D都唔油膩，香脆與軟滑彈牙之間。
再搭配左兩款醬：沙拉醬及中濃醬(即係炸豬扒醬)，前者沾菜絲為主，但沾炸鰻魚一樣夠清爽好味；沾中濃醬，就似食緊日式吉烈豬扒嘅香甜口味。
生菜絲伴碟，有助解油膩，食多左都無問題。
白咖哩好香濃，質感濃厚，但一開始時咖哩味唔係好突出，但原來佢底下有黃咖哩醬，原來要攪拌埋一齊先恰到好處！但係食到半碗左右，個人感覺會有少少膩，因為個烏冬好鬼大碗。
講到烏冬麵，因為佢話係新鮮手工切，所以粗幼少少有不一致，口感好滑，咬落彈牙，有嚼勁，掛汁既能力好。雖然有點膩，不過呢個搭配好有新鮮感。
HK$88我要寫咁多字去介紹佢，就知佢真係好多野值得一提，價錢咁平，值得一試！
題外話/補充資料：
我打文之前望一望其他人嘅差評，我再望返我叫左嘅野，好似其他人講嘅野好似個鰻魚飯唔同左樣又真係奇怪左D，不過我今次叫呢個鰻魚烏冬又真係好OK，HK$88我覺得真係可以一試，真心抵食
(以上食評乃用戶個人意見 , 並不代表OpenRice之觀點。)
張貼
