佐賀山田 · 涮涮鍋 (已結業)

住喺太古城嘅朋友邀請我嚟到康怡廣場北座嘅佐賀山田來個涮涮鍋，一人一鍋嗰隻，知我習慣嘅人知道我係鍾意咁樣嘅，因為比較衛生。7點前嘅極級 美國和牛/牛小排放題 每人327蚊，可任食90分鐘，由於佢哋出嘢快，所以時間係足够嘅。可揀嘅湯底好多，有日本樱花蝦沙嗲湯、 九州風味豬骨濃湯、華味鳥雞白湯、昆布鰹魚清湯、完熟番茄湯、壽喜燒風味湯底、麻辣鴨血湯、 蟲草花胡椒豬肚湯、骨膠原美顏玫瑰花膠雞白湯.....我哋倆個人就揀咗九州豬骨濃湯和蟲草花胡椒豬肚湯，而呢個餐名為“美牛三重奏“，一定唔少得嘅係美國SRF和牛 、極品美國牛小排和美國CAB牛坑，SRF和牛有好靚油花分布，食落 軟腍多汁；牛小排肉質結實有咬口；至於CAB牛坑爪就有濃郁的牛味，各有特色唔輸蝕。呢度以肉類為主，但都有海鮮食，日本廣島蠔、北海道帆立貝、海虎蝦、墨魚仔和紐西蘭青口都嗌咗幾轉，除此之外，豚肉，牛五花，各種蔬菜亦都哋嘅選擇，唔錯唔錯。