Lumen Cafe (已結業)

機緣巧合下，黎左極少踏足既葵興工業區，無諗過依區會有間戲院。地理上唔近地鐵站，應該做同區巿民生意多。戲院2019年7月開幕，都算幾新。一共5個影院，門面都唔差。一般戲院只有小食部，買下爆谷、小食、飲品等。但依到戲院門口竟然係一間餐廳！依個設計係幾有趣。唔係黎睇戲既朋友，都可以幫襯前面餐廳。餐廳分左食物部同飲品部。飲品部似台式飲品店，有珍奶，買入戲院可以多一個選擇。食物部真係估佢唔到！由小食、米線、拉麵，到西冷牛排、一人火鍋、雞煲都有！選擇唔多，種類有點跳脫。主食由$58 - $198不等。🔸龍蝦湯海鮮喇沙拉麵 $68MENU上圖片影得好吸引，顏色豐富，好多配料。段估都未必會有咁多掛？一心諗住試伏，點知原來有驚喜！雖然賣相無圖片中排得咁靚，不過海鮮材料算十足。有大蝦、青口、魷魚圈、墨魚丸、大蔥、蛋、豆卜、蘿蔔。食材新鮮，大蝦、魷魚圈等夠彈牙，墨魚丸有花枝粒粒口感，唔HEA。湯底比起一般喇沙加入左龍蝦湯，飲到淡淡龍蝦味。味道尚可，未到超級濃郁，唔辣。椰奶味香，湯底唔會過油。成碗麵份量勁多，正常女仔一定夠飽！