M3 Italian (已結業)

意大利餐廳我就食得多，但係高質嘅究極為罕有。喺大圍積福街有間穩世意大利餐廳，識食嘅一定會去，大部份人都嚟呢度happy hour 貪佢靜靜地格局又光鮮企理。我同朋友有啲肚餓，叫咗個飯同意粉，香濃墨魚汁燴意大利飯配香煎魷魚筒，呢個真係好特別，唔似出邊就咁用墨魚汁撈個意大利飯就算，而係加埋魷魚筒，切成卷狀，白雪雪咬落去又彈牙，口感豐富，而且加埋火箭菜，清新又味道。仲有我好欣賞呢度嘅自家製手工意粉，叫了香辣旋片大蝦手製意粉，平時啲意大利粉會太油膩，但係呢個炒到啲蒜片好香，仲有少少辣椒，為呢個炎熱嘅夏日帶嚟火辣辣嘅口感，仲有啲意大利粉蛋黃色好有口感，令我最欣賞佢嘅大蝦份量都幾多每人三隻，新鮮無比！最後飲埋杯凍檸茶坐多陣就Perfect啦。