知味屋 (已結業)

最近大家係網上面成日見到有一間餐廳係度做「98蚊任食牛扒」同「108蚊任食牛扒加豬扒」既宣傳，而呢間餐廳就開正係我公司附近。當然，我就唔係貪佢呢個任食優惠而去光顧，反而係因為知道呢間餐廳係屬於一間幾出名的自助餐X扒房集團"Mr Steak"旗下的新型西餐廳，本身食過幾次Mr Steak都覺得質素唔錯，所以今日午餐都試試呢間新餐廳。之前都食過佢午餐既芝士流心漢堡包同埋韓式牛肉炒意粉，都覺得好好食。但今日有個新Menu，所以試下新野。我就叫左個「穀餵西冷牛扒拼英國皇室豬扒二重奏」，同事們就叫左個「紐西蘭特級肉眼牛扒」。兩個餐都送一個羅宋湯，味道唔會好似花園餐廳個種勁多茄膏丶茄醬味，味精味唔重，易於入口。本身出街都好少叫豬扒食(除左焗豬扒飯...)，因為多數都係又乾又難咬。今次食呢個二重奏竟然有少少驚喜。西冷叫左5成熟，亦都煎得番5成出黎比我，証明大廚功力唔差。但係西冷本身質素唔算好出色，叫做不過不失。相比之下，豬扒肉質非常鬆軟，而且保留到少許肉汁。食落口，唔覺得有用到鬆肉粉之類去醃制。加上本身配味唔錯，比起牛扒更加出色。薯條本身冇咩調味，但有一樽黑胡椒同鹽可以自己加味，68蚊黎講算幾出色。