越僑

營業中

休息中

中環嘅打工仔每日都要為午餐頭痛。餐餐食快餐食到悶，試下上樓啲西餐又閒閒哋兩三舊落樓。鐵行里幾間餐廳都各有特色，而且價錢合宜，可以話係窮忙族救星。其中《越僑》人氣高企，大抵因為品質穩定，而且$4X-6X 一個越南lunch即使喺其他地區都好難得，何況係中環！《越式春卷配炸蝦餅撈檬》，呢間啲蝦餅唔係常見嘅圓形，而係好似魚片咁一片片。口感彈牙，食得出蝦味。而且春卷以芋頭作餡，炸得剛剛好冇過火。外賣嘅《雞扒撈檬》足足有兩件雞扒，檬汁亦畀足兩包毫不吝嗇。入口皮脆肉脆，加埋配菜非常滿足。《牛柳粒配越式紅飯》係餐牌入面差不多最貴嗰碟飯，都係$60左右。牛柳粒柔軟無渣，配上牛油炒紅飯同蔥油，邪惡而美味。《芥辣蜜糖汁炸雞柳配飯》係呢個月逢禮拜一先有嘅特別餐牌，如小山般高嘅雞肉炸得外脆內軟，配上芥末同蜜糖調成嘅醬汁，食到唔停口。值得一提嘅係飯量甚大，可叫少飯以免浪費。