尚鮮海鮮料理 (已結業)

自從天氣轉涼之後，我出街打邊爐嘅次數都密左好多，今次同文員G去左銅記打邊爐。呢間鋪個名叫尚鮮，其實我去過另一間尚鮮，個間就係食日式烤肉放題嘅，而今次呢間就係打邊爐嘅，唔知會唔會都一樣咁高質呢。坐低之後，我地叫左個雙拼湯底，分別係三高野菌茶鍋同埋血池麻辣，一個就好養生，另一個就好刺激。血池麻辣呢個湯底真係好岩食辣之人，個名真唔係浪得虛名，初頭望落個湯底又唔似咁辣，因為以往見親啲麻辣湯底會有好紅嘅辣油係表面。第一次擺食物落去煮黎食都未覺辣，但係滾多幾滾，就開始黎料啦，愈食愈辣，超級過癮。而野菌茶鍋就會清一啲，同個麻辣湯底做返個平衡。食物方面，我地叫左碟手切牛邊位，文員G聽到牛邊位以為我叫左牛鞭去進補，笑左。話說呢個牛邊位其實都幾好食，牛味好出，而且都幾厚身。跟住有碟四圍餃尚盛，一碟有四款餃子，每款兩隻，個人特別鍾意蟹皇餃，每款餃子用嘅食材都好新鮮，包得好足料。之後就叫左個二人海鮮尚盛，呢個好嘅地方就係可以一次過試唔同種類嘅海鮮，例如蟶子、廣島蠔等等。整體上，呢間店令我覺得有驚喜相信就係個麻辣湯底，深藏不露，食辣之人一定要試。