品川日本料理 (已結業)

好彩係今日打風姐，尋日就去咗荃灣海之戀三樓嘅品川食日本放題 ，好好勁食一番。先拔頭籌嘅當然就係刺身， 款式同選擇都同出面一般嘅放題差不多。 本人至愛嘅三文魚都合格有餘。 另外啲甜蝦都好大隻，都算鮮甜 。之後就要食我鍾意嘅壽司 。壽司每件都細細的，食多幾件都唔怕。要讚嘅就係個黑松露壽司，雖然係放題但係都有一定嘅質素 。然之後就係到燒物。 本人最愛嘅就係燒菠蘿 ，酸酸甜甜可以消滯之餘 ，又可以減低罪惡感 。值得推介嘅就係個芝麻雞翼， 即叫即炸， 熱辣辣肉質鮮嫩 。另外一款我推介嘅就係牛舌， 厚薄度剛好，沒有騷味， 點少少檸檬汁已經好好味。 個吉列炸蠔都做得很不錯 ，唔係一味得厚厚嘅炸粉 。同場加映最特別嘅就係拖肥味嘅可樂同朱古力味嘅可樂。 味道如何賣個關子， 鼓勵讀者們自己親身去試下啦。總括嚟講 ，二百幾蚊一個人嘅放題，品質已經算中上 。人多嘅話可以坐喺落地玻璃位置，可以飽覽荃灣嘅海景。 同三五知己喪食一番，傾計吹水，別有一番風味。