築間酸菜魚

聽個名築閒酸菜魚，你一定唔會知道係全港首間台式酸菜魚，名副其實嘅過江龍，吸引咗好多捧場客。餐廳光猛整潔，座位排列整齊，近窗外望街景，仲正呀！餐廳有個小bar位，可以自行調製陳皮洛神花茶，冷熱隨意，非常開胃，讚！必點係總長酸菜魚，烏鱧魚片鮮甜，配料有黑木耳、金菇、腐竹、寬粉及自家醃製酸菜，酸味一流，好突出；辣味又夠，凸顯咗湯的鮮味，令人一試難忘，真正做到店長推介！純愛蕃茄魚係用大量切件蕃茄，配合鮮嫩魚片及其他材料，令整個湯充滿濃郁蕃茄香味，完全係另一種口味。台式小食有鐵漢小酥肉，五花肉炸得好香口，唔油膩，食得出有少許麻辣味，份量頗多，唔錯。椒鹽雞軟骨有別於一般細細粒嘅雞軟骨，可能部位唔同，佢嘅雞軟骨係長及大條嘅，但都做到酥香脆口，椒鹽極之惹味。地道台灣甜點有紅豆仙草 ，一次過食到香甜紅豆及甘味仙草，兩種口感好過癮。另外，芒果奶凍都要試，因為香甜幼滑，奶味十足嘅奶凍係自家製，芒果醬好好味，夠凍又好食，一流！而且餐廳又特別安排酸菜魚分為一至四人份量，令到一個人都可以隨時享用，值得讚許！加上服務員殷勤有禮，細心招待，感覺好滿意。