鮮一夜火鍋 (已結業)

今日朋友話帶我去荃灣食好嘢， 去到火鍋店， 已經好多人喺度食緊，朋友推介食呢個一夜皇御套餐。套餐做緊$268，除任食火鍋，飲品任叫外，仲有即炒雞煲、花膠雞煲翅、鵝掌炆鮑魚、五色刺身拼盤、安格斯肥牛肉、時令海鮮拼盤。鵝掌鮑魚炆得好稔滑，鮑魚雖然不是非常大隻，不過以咁嘅價錢有咁多嘢食，都不敢苛求喇。花膠雞煲翅花膠軟滑，湯底香濃，非常滋潤！雞煲我哋揀咗少辣，侍應加上大量葱蒜、洋葱即場在我哋面前炒，香味攻到口水直流。五色刺身拼盤有帆立貝、赤蝦、三文魚、希靈魚、帶子， 大件夾新鮮。海鮮拼盤有花甲、鮮蠔、象拔蚌、貴妃蚌、鮮蝦，花甲無沙，貴妃蚌同蝦都好大隻。安格斯肥牛以上係限量供應， 即係食完冇得添加 ，但係我食完雞煲+ 花膠翅+鮑魚鴨掌+刺身拼盤，都已經飽咗八成有多，之後揀咗個清清地嘅芫茜皮蛋湯底嚟灼牛肉同海鮮拼盤，另外再隨便點咗數款火鍋配料，就已經飽到食唔落喇！估唔到以咁嘅價錢，淨係食佢供應嘅食物，已經回哂本喇！何况仲有咁多其他任你食嘅火鍋配料㖭。其實仲有好多嘢想食，可惜個肚唔爭氣，連免費雪糕都食唔落，要等下次嚟，才可以嘗試其他食物喇。