堅信號上海生煎皇 (花園街) (已結業)

星期日同朋友係旺角行街，行到3點先想食午餐，去到堅信號吃上海菜，原來可以叫下午茶。下午茶共有9款，包括灌湯小籠包、香煎鍋貼、四川擔擔麵、韭菜豬肉水餃、沙嗲牛肉麵、雪菜肉絲麵、古法豬手、上海排骨和上海粗炒，款式多樣化，價錢最貴46元，好抵！加10元有酸辣湯，再加12元有小食，再加2-5元有野飲。我叫左上海粗炒，加酸辣湯、生煎包和豆漿。另1個叫左上海排骨飯，加酸辣湯、韭菜豬肉水餃和凍奶茶。上海粗炒不錯，有鍋氣，乾身彈牙，好食。酸辣湯不酸不辣。生煎包夠脆，略為细隻。豆漿有豆味。上海排骨鬆軟度適中，有肉，不錯。韭菜豬肉水餃略為淡味，吃不出豬肉味。總體覺得不錯，可以再食。