龍鳳祥餃子館 (裝修中)

每次去完隔離澳牛都會經過呢間餃子館，但每次都食到飽飽地所以冇入去試，今日下午茶時間，見到佢有套餐，好似幾平又多嘢食。叫咗A1套餐$37，五隻韭菜餃，小食叫咗香煎豬扒，再配凍嘅無糖豆漿。侍應極力推介佢哋新推出嘅冬陰功湯底(+$18)，我屋企平時食餃子都係點呷醋，就一於試吓新嘢啦。上枱嘅時候真係好有泰國風情，下邊有蠟燭熱住。湯本身夠酸，辣就唔算太辣，就算唔食辣嘅朋友都應該接受到嘅。韭菜餃細細隻，皮算薄而且多韮菜，而且本身調味都夠，我諗如果係煎嘅應該仲好食d。個人覺得都係分開韭菜餃同冬陰功湯底會好啲。兩樣嘢分開都好食，但夾埋就有啲格格不入。反而香煎豬扒夠鬆，食落有啲炭香味，夠晒惹味。自己都好驚喜竟然可以揀無糖豆漿咁健康，最後仲嗌多咗一杯添。加左兩隻醉香雞翼($14)，雞翼好大隻，本身用筷子試味嘅時候覺得啲汁酒味較重，而且係鹹甜味都有齊，但係食落反而酒味唔算太出。總結：我唸煎餃應該會更加出色，見到好多人都係叫煎餃，不過我自己覺得呢個下午茶都幾抵食，經過嘅朋友絕對可以一試。