K-Net Square (已搬遷) 新店位置

今晚放左工同個朋友係太子行左陣街，見大南街個邊多左幾間餐廳，就諗住行過去睇下有咩好食。見到有Café，有邊爐，有酒吧，望左幾望後我地決定去試下個間叫K Net square既酒吧。我記得我係旺角都有見過ga，不過一路都冇機會試，但今次見佢個set dinner又好似好吸引又唔太貴，咁就去試下啦。佢個set dinner$168有湯，有鵝肝多士，再加4選1既main course，同埋2小時任飲既紅酒或者汽酒。個人黎講$168有得2小時任飲，已經覺得好抵，仲要佢有野食。個湯唔夠熱，仲有唔係太飲得出係咩，鵝肝多士，佢個塊鵝肝好厚，煎得又夠香，如果個多士可以脆D就仲好啦。不過塊鵝肝真係好正，回味呀!Main course 既選擇有牛、雞、魚同埋意粉，我要左個香煎石斑柳配牛油忌廉汁，個魚同個汁都好滑，下面仲有薯蓉，夠晒飽肚。飲品方面我叫左Apple Cider，佢個賣相一流，而且仲有得re-fill真係不得了呀。呢間酒吧應該唔係開左好耐，所以人唔多。坐得好舒服。