名朝特色火鍋 (已結業)

又係佐敦區開餐，見好耐無打過邊爐，今次去到呢間名朝火鍋，有好多唔同湯底選擇，兼且材料供應都多，整晚都食得幾開心。係火鍋之前，先另加少少錢食左日式刺身。賣相同味道不比外間日式餐廳遜色，三文魚厚切，鮑魚粒爽勁有咬口，泰式辣蝦鮮甜味美！係個胡椒豬肚湯滾緊嘅時候，去左自助蔬菜吧揀下心水靚菜。同呢度嘅飲品，配料，同湯底一樣，都係選擇非常多，而且質素高, 每樣菜都好新鮮爽甜。胡椒豬肚湯底帶著些少微辣，係湯底中滾下海鮮，包括新鮮嘅海蝦，花甲，牛拍葉等等，都完全食得出食材本身嘅鮮味。而自家手打嘅蝦丸，墨魚丸夠晒彈牙，少了一份味精嘅味道，多一份真材實料嘅感覺。愛牛之人一定要點嘅，美國肥牛同霜降手切肥牛，兩者牛香肉味甚香濃，脂肪比例完美，係湯上快滾一陣，質素極高！最後當然係甜品時間，呢度甜品嘅選擇真係貼近酒店嘅級數。焦糖燉蛋，布甸當然供應，最正嘅係有芒果拿破崙，同埋即叫即做嘅綠菜梳乎里，真係極之少有。