老鍋台式火鍋 (京都廣場) (已結業)

銅鑼灣駱克道京都廣場二樓，有一間臺式嘅火鍋店叫做老鍋，好鍾意佢入邊嘅格局，尤其是卡位坐得非常之舒服。老鍋嘅地點非常方便，如果約朋友傾下偈，打下邊爐，真係不二之選。👍🏻午市有個二人火鍋套餐，個湯底非常之豐富，我哋叫咗尚膳養身鍋，裏面有好多鮮人蔘，大大條🥰，仲有好多紅棗、粟米、冬菇，真材實料。☺️套餐有一碟肥牛，油花豐富、質感軟腍，肉質鮮嫩，分量不少呢！好欣賞佢啲手打肉丸，有墨魚丸、豬肉丸、貢丸同埋魚皮餃。啲丸仔的質素唔錯，全部都好煙韌彈牙，尤其是係魚皮餃啲皮好煙韌，豬肉餡多汁好味。菜籃嘅菜好新鮮同埋係一啲嫩嘅菜，鮮甜有菜味，有娃娃菜、生菜、油麥菜、金菇同埋鮮冬菇。套餐包咗米線，兩個人食曬所有嘅嘢都已經好飽喇，每人百幾文，環境好，食物質素好，我哋都好滿意。