新南苑私房菜火鍋鷄煲 (華僑商業中心) (已搬遷) 新店位置

今日黎到旺角做野，距離下午開會仲有大把時間，同同事決定不如攤長個lunch time食個雞煲火鍋攤下！ 黎到旺角中心附近嘅華僑商業中心，一上電梯就見到大大塊新南苑嘅廣告指示客人搭電梯按3字就去到。大堂都有指示往3樓係用另一部嘅。 入座前店員會先問我地揀咩餐，原來午市火鍋都有3種唔同選擇：牛王餐、海鮮餐、雞煲餐，豐儉由人。牛王餐同海鮮餐係除左黑毛和牛、安格斯牛同海鮮之外仲包埋雞煲架！任食雞煲餐連2小時任食火鍋只係99蚊！CP值極高！ 同場加映晚市餐牌，都好抵食！ 入座發現原來好多食客喜歡係午餐時段打邊爐，認真識嘆～ 飲品櫃及醬料區都係以自助形式，疫情關係為己為人出去拎野食都要帶番口罩～ 好快雞煲就送到啦！店員都好耐心地為我地介紹雞煲嘅煮法。原來雞煲每2分鐘要開蓋撈勻，一共4次先食得。8分鐘後就食得，少辣嘅雞煲辣得過癮，雞肉肉質嫩滑，正！ 食左兩三轉雞煲係時候轉打邊爐啦！我地揀左椰子雞湯。火鍋餐牌一共有超過40款食物可供選擇，應有盡有！ 食完火鍋仲有3.6牛乳奶凍呢～奶味濃郁，正！ 埋單一人都只係99蚊！鐘意食牛嘅我下次一於試埋牛王餐先！ =========================