永華日常 (淘大商場1期) (已結業)

之前聽朋友介紹話好抵又好食，今朝特登約埋幾個好友試試。真係冇諗過竟然只需要38蚊就可以食到3個餸嘅早餐，仲要出前一丁麵都係唔使加任何嘅錢就可以食到！！！鍾意食出前一丁一朋友記得快啲過嚟試啦。今次我就叫咗沙爹牛肉通粉，餸方面就揀咗炒蛋、餐肉同腸仔。個人認為最好食嘅地方係有認真咁煎香咗啲餐肉同腸仔先至會拎出嚟，而唔係求求其其煎都未煎就拎出嚟。個通粉都十分之煙煙韌韌，係本人嘅最愛。朋友就叫咗沙爹牛肉出前一丁，餸方面就揀咗煎蛋、餐肉同煙肉。出前一丁好好食就唔使講啦，但係佢哋嘅煙肉都煎得好香。總括而言呢，抵食之餘食份量好足夠，令人想去再去啊！