阿久根和牛立燒店 (已結業)

鋪頭坐落於旺角鬧市之中，位置方便聚腳。本身有啲擔心鬧市嘅地鋪會比較喧鬧，但係一入到去仿如置身另一個世界，完全係大隱隱於市嘅感覺，令人驚喜又可以盡情享受一餐休閒嘅時間。今次食左極尚和牛定食同阿久根和牛涮鍋，分別用燒烤同火鍋嘅方式食和牛，各自有一番風味。我個人就比較鐘意燒烤，可以鎖住肉汁，食落口嘅時候可以係口腔感受到鮮嫩嘅肉質又惹味。而且餐廳提供生菜免費添加，連埋燒左嘅和牛一齊食，既有濃厚嘅油香，又有生菜嘅鮮甜，兩者相得益彰。餐廳好貼心咁為每款肉都用一塊小木牌標示岀呢款係咩肉，令客人知道自己嘅心頭好，無論係加單定下次再光臨都可以特意揀返自己鐘意嘅肉種。成個用餐過程無論食物質素定服務態度都非常令人滿意，絕對值得一試!!