元札幌拉麵 (悅來坊)

營業中

休息中

呢輪三兄弟個腸胃都唔好，屋企啲乳酸藥食得七七八八，所以今日過左荃灣間寵物店買乳酸比佢地。後來行到過黎熊貓酒店悅來坊搵食，之前食過呢個商場嘅牛之鍋同定食8，今次就試下地庫呢間「元札幌拉麵」啦。遇上食飯時間，加上店鋪唔大，坐位不多，難免要攞飛等一等。等左5分鐘左右就有位啦，攞起份MENU睇睇，小食同飲品種類都算多，而且價錢都幾抵下喎。主食方面，有拉麵同飯可供選擇，而拉麵除了有3款湯底，味噌、醬油同埋鹽味可揀之外，連麵嘅軟硬度都有得揀，認真貼心。牆上嘅木制掛牌相當精緻，令店鋪沾上一番日本風味。先黎小食，串燒雞軟骨，雖然稍為乾了點，但仍然食到照燒味道，而且好香好脆。串燒雞翼，外皮燒得夠晒香脆，價錢只係$15咋，真係好抵食。極力推介呢個燒牛舌，呢度個牛舌不單夠厚，而且相當惹味，口感十足。有機會一定要試下。老婆點左豚軟骨拉麵，選了醬油湯底及硬身麵底。佢最鍾意隻流心蛋，唔會太生或太熟，啱啱好。豚軟骨煮得夠腍，有咬口，而麵底就夠晒彈牙。而我個牛肋條飯連沙律、蒸蛋、麵湯都只係$75，認真超值。而且份量都唔細，正常男人食量都夠飽架。