Gustoso Burger (海都大廈) (已結業)

SOGO 血拼完，去咗附近嘅Gustoso Burger簡單買個漢堡回家！小店主打漢堡，鋪面唔大，只做外賣生意，亦因為咁，漢堡價錢唔貴，$39-$88已有交易，喺銅鑼灣區算係非常親民。漢堡除咗分豬、雞、牛、海鮮及和牛系列之外，仲有埋素Burger，選擇多樣化。我揀咗牛油果脆雞堡($58)，材料簡單，有脆雞，牛油果醬，牛油果片，洋蔥，車打芝士及番茄，配搭雖然穩陣，但味道唔錯，特別係塊脆雞，炸得香脆唔油膩，咬落肉質嫩滑之餘仲帶有肉汁，唔會炸得好乾。漢堡包咬落唔會好空氣感，比較紮實，如果烘得脆口d就更有口感啦。不過始終返到屋企先食，隔咗15min左右，牛油果醬開始有少少變黑，影響賣相。如果將洋蔥擺喺牛油果醬下面，可以減慢氧化速度。+$19升級套餐，有3粒香芋地瓜丸及一杯$18飲品。香芋地瓜丸好有驚喜，唔會炸得油膩，入面係軟綿香甜嘅香芋地瓜蓉，雖然邪惡但好味！呢度飲品同樣好多選擇，有梳打、珍珠奶茶、鮮奶、朱古力同芝士奶蓋系列。天氣熱，揀咗杯凍白桃烏龍茶（原價$26,補$8)，茶味香醇，帶有淡淡白桃香甜清新，消暑一流。落單後先見到原來糖度同冰量都有得揀，如果店員主動問一句會更好。