好好運快餐店 (已結業)

嚟咗荔枝角返工之後，第一次食呢間隱世好好運餐廳。隱世，因為佢個位置都好隱秘，要喺半島大廈再捐入去，唔係有同事帶一定搵唔到。地方唔算細，但坐無虛席，仲會有條龍等，不過都唔算等得耐，而且會同你落單先，幾乎一坐低就有得食。$52包麵同嘢飲（凍飲都唔洗加錢），真心講，非常抵食！影呢張相無專登撩啲牛肉出嚟，但其實個碗入面係超多會食唔晒果隻。仲可以加2樣餸，我揀咗煎蛋同紅腸，兩塊紅腸厚切到司華力腸咁，真係好驚艷！ 仲要啲沙嗲牛肉超濃味，啲汁係無慳到，非常濃郁，肉質都好食，淋既唔會好多筋。同埋茶記嚟講，佢都算好乾淨企理，都好多OL嚟食，不過好似只開11am-5pm，喺附近返工既朋友仔有時間真係推介去試下！