Grill'er 石燒扒專門店 (已結業)

之前帶小動物睇醫生都冇留意附近原來有間日式鋸扒，放假有機會當然要去試試。午市menu非常抵食，而且肉嘅種類好多。同桌就鎖定安格斯封門柳，聽講唔係好多地方有得食。本來兩塊封門柳會有特價，但我又想試牛肩胛，所以最後叫兩款肉。午市有得任食白飯、沙律同羅宋湯。珍珠米煮得好冧，仲可以自助加飯素。沙律菜偏硬身，中段員工有加粟米，令沙律口感豐富。羅宋湯酸酸甜甜，食肉之前飲吓幾開胃。聽講封門柳嘅肉味會比較濃郁，先咬一啖，果然肉味十足，上菜個陣仲係一成熟，慢慢用熱石加熱，控制到舊肉唔會太熟，橫切面仲非常靚。不過因為要專心控制熟度，所以冇影太多相。牛肩胛就比較軟屬，容易咬開。同樣一上菜個陣都係好靚嘅一成熟，切開後都易控制。牛肩胛牛味都好夠，唔使特別點好多醬汁。員工仲非常友善，會詢問吓我地覺得啲肉點。呢次真係幾滿意，之後都應該會回頭！