添寶手撕雞 (友光大廈)

營業中

休息中

Lunch $35一個手撕雞撈麵，或者手撕雞飯，個人而言係幾抵食嘅，但坦白講，份量對男士們嚟講唔係好夠，十足小隻馬榮川乃亞，係靚呀，個樣睇落開胃，可惜太奀太瘦唔夠份量。手撕雞撈麵／飯，有胡麻醬、麻辣醬、芝士醬等等選擇，本人一般都係選擇麻辣醬撈麵，撈麵掛埋啲麻辣汁夠香口又開胃，適合口味偏重嘅人士。不過，今次想飽肚少少，於是試下手撕雞飯。味道嚟講，比起撈麵係遜色啲，除非閣下喜歡淡口味少少，用白飯中和返啲醬汁。除咗手撕雞，其實仲有生腸、牛肚、牛𦟌、豬手、鴨腳、雞腎之類嘅餸菜加配，好似加一款$8，寫住「皇牌」𠴱啲餸就$12。今次加咗「皇牌」$12麻辣牛𦟌，有驚喜。利申，本人唔係好食得辣，然而呢間啲麻辣一向都係辣度不足，換言之佢唔係真・麻辣嘅麻辣牛𦟌，錯有錯著反而啱本人口味。至於對食得辣嘅人嚟講，對佢嘅所謂「麻辣」應該係會失望嘅。