梅光軒 (登龍街) (已結業)

見到登龍街又開左新既拉麵店，就同男朋友去試下喇。首先一讚既係店員既服務態度好好，而家好少有咁好禮貌，仲會問你想要熱茶定凍茶。見到呢間拉麵攞埋米芝連，係北海道好似好出名咁。首先個叉燒丼唔記得影相，原來諗住唔寫，但係我覺得叉燒食好值得讚。第一，價錢平，$38就有一碗，而家份量都唔少。第二，用料不錯，叉燒好多亦好滑，飯係用珍珠米。第三，有創意好特別，特別在於佢用芝麻醬，一見到以為會好奇怪，點知食落幾特別幾夾幾好味。<灸燒五花叉燒拉麵(醬油)，$98>然後有個灸燒五花叉燒拉麵，醬油味既湯底味道適中，唔會太濃太淡，一入口會淡啲然後就會慢慢濃。叉燒超級大塊，味道不錯。<拉麵加配：餃子(3隻) + 汽水，$15>餃子唔算特別出色，不過勝在煎得好靚同埋夠熱，另外餃子汁係自己用豉油，醋辣油去溝，可以按自己既口味調出想要既味道。<抹茶蕨餅，$10>最後令我好驚喜既係個蕨餅。平時唔食蕨餅既我都覺得幾好味，因為夠煙韌，而且佢啲抹茶粉唔會太粗太嚡。