Mee...lemongrass (已結業)

同朋友喺銅鑼灣行街行到晚飯時間，佢話知道皇室堡地牢有間食東南亞菜的餐廳唔錯於是就帶左我去食。餐廳果然好多客。朋友推介下我哋叫左呢幾樣食物、軟殼蟹米紙卷6件($68)、招牌無骨海南鷄飯($80)、檳城炒貴刁($76)、香芒椰汁糯米飯($48)。上菜速度好快，唔洗幾分鐘餐廳已經送上軟殼蟹米紙卷，咁啱適合做餐前小食，除左軟殼蟹好鬆化外，米紙入面的菜、彩椒、芒果同牛油果都好新鮮，彩色繽紛，好食得嚟顏色亦好吸引。招牌無骨海南鷄飯，雖然飯量稍為少左D，不過鷄肉食落嫩滑好有鷄味，配埋兩種醬汁，夠晒好味，唔怪得望落去有咁多枱客都有叫嚟食。檳城炒貴刁($76)，配料有蝦、青口、魷魚、魚片等，味道咸甜中帶辣，炒得都夠火喉，又唔油膩，好惹味！香芒椰汁糯米飯，糯米飯有香濃糯米味，口感軟身得嚟唔會太幾腍或太黏，配埋香滑嘅椰汁同新鮮嘅芒果，呢餐品嚐咁多東南亞美食，埋單都唔洗$300, 無得輸！