泰妹餐廳 (已結業)

平時都會間唔中去黃埔食飯，因為黃埔真係好多餐廳選擇。而且有咗地鐵之後真係好方便，今次同朋友係附近吉之島買完衫就順勢去食呢間泰國餐廳。餐廳環境都相當舒適，餐牌就有不同嘅泰國菜式或者套餐可供選擇。泰式魚肚羹推介菜式，魚肚份量真係超多，配埋雞蛋、冬菇、肉絲等相當豐富，味道方面亦都好好味，二個人每人都可以食到好幾碗，真係好抵。海南雞飯雞肉嫩滑，配埋醬汁一齊食真係好有風味，油飯亦都很香，相當地道。紅咖哩豬頸肉另加層層疊蒜蓉包呢個紅咖哩整得相當出色，味道剛好，唔食辣嘅朋友都可以接受到。內裡更有好多蔬菜、豬頸肉。配埋蒜蓉包一齊食簡直完美。而且佢哋嘅蒜蓉包真係相當鬆軟，沾上惹味嘅咖哩汁真係食到停唔到口。泰式炒雜菜最後當然要食啲蔬菜，而呢個炒雜菜真係咩都有，啱哂咁貪心嘅我。