阿來泰式地道風味 (已結業)

有位朋友住係長沙灣，佢叫我哋一定要嚟阿來泰式地道風味食下最地道既泰國菜。 今日就一於黎試下！入到門口見到已經淨番幾個位，好彩唔使等位。 餐廳入面只有好多抵食嘅餐，非常抵食， 所以我哋就嗌咗個二人餐。 裏面有咖哩炒蜆，海南雞飯同埋飛天通菜。鍾意食蜆既朋友，泰皇咖哩炒蜆係一個非常好選擇。分量方面非常之咁大碟！啲蜆又大隻又鮮甜，兩個人完全夠食，仲會好滿足。而咖哩方面呢味道好濃同埋唔會好辣，岩岩好，撈飯真係好惹味！呢度嘅海南雞真係非常好，可以大啖大啖咁品嚐滑滑既雞肉，彈牙之如又有好爽滑既雞皮保留得到，配合埋海南雞醬汁，再加埋個雞油飯， 簡直係錦上添花，十分滿足。飛天通菜望落好普通但係千祈唔好畀佢賣相呃到，連平時唔食菜既我都爭住要食，蒜味非常香，辣味惹味，融合得非常好，一試難忘！之後我哋嗌咗個三色椰汁冰，椰汁冰解辣一流，椰汁味重，另外會有啲配料，配料都非常好食、好q彈。最後，我同我個朋友都非常滿足，食得好開心，值得推介！