Have A Date (已搬遷) 新店位置

今日行開呢邊，就同男朋友搵下有咩食，雖然都係灣仔，不過好少嚟呢邊食嘢。見到呢間餐廳好似幾多人食，價錢都算幾平，就吸引左我哋去食啦。我今次終於記得影menu，款式話多唔多話少唔少。最後我揀左雞翼辛辣麵，佢個辛辣麵煮得幾好食。麵嘅質感偏硬但又唔生，唔會好似平時食嘅好腍。雞翼都煎得好香，一咬落去仲有啲肉汁同埋好嫩滑。男朋友點嘅瑞士汁炒牛河就比較普通，唔會覺得特別好食，河粉略嫌炒得過腍，相比之下辛辣麵比較好味。呢個紅豆冰本身係我點嘅，不過我嫌佢嘅奶味太重，所以最後我男朋友飲左，佢就話好好飲。除左奶味有啲過重之外，佢嘅紅豆煮得好好食，好腍好粉。整體而言，如果我係附近工作應該會成日去食，因為都性價比都幾高。不過又不至於會推介到刻意到灣仔食。