星廚 (已結業)

同朋友食飯唔知食咩好，又醒起講左好耐話去試呢間，今次終於食到喇。首先有個一口牛脷，其實有四舊不過有一舊比個朋友食咗。佢個牛脷好好味，整得好腍好似食緊牛腩咁，佢個牛汁好特別，兩者加埋食落就好好味。蒜蓉包就比較普通，不過佢係烘到個麵包好脆但係咬落係唔會刮口嘅。同埋佢每一塊包都搽左薄薄既牛油加蒜蓉，搽得好均勻。而且啲牛油都係好香嘅，唔係好平好cheap嗰啲。焗豬扒飯，個汁你以為佢係一般嘅蕃茄斗，點知佢係一個好特別嘅蕃茄汁。特別在於佢加左啲唔知香料同黑椒，令到佢變成一個好特別嘅蕃茄汁。個豬扒就普普通喇，整得好腍，但個豬扒本身唔係好新鮮。呢個牛肋骨整到好腍好好味，個牛汁都好香。佢配既炸薯角同沙律菜都好好味。炸薯角炸得好香脆，一啲都唔乾，一咬落去好粉好正。然後沙律菜好新鮮，配少少黑醋都好好味。呢個牛扒都不錯，有好香既牛肉味，又唔韌。呢個雲吞好特別，有別於一般食嘅港式鮮蝦雲吞同法式雲吞，有少少似係兩者嘅mix版。蟹雲吞我係第一次食，有好香既蟹味，配埋個忌廉汁係無得彈。三個人食到捧住個肚走，由好肚餓食到好飽都係百幾蚊，抵到喊。平價抵食又好味，絕對推介。