日日香鵝肉飯店 (和富中心) (已結業)

今日夜晚放工嚟到公司附近位於北角和富嘅日日香鵝肉飯店，其實之前中環食過一次，喺銅鑼灣希慎廣場又見到已經好想試，只係好多人排隊無機會，今日見到仲有位就即刻入咗去食。交通尚算方便，巴士同地鐵都係行5分鐘內就會到。環境都十分乾淨，非常值得一提嘅係餐廳本身嘅設計非常用心，有好多燈牌做裝飾，而且風格一致，整體感覺好似真係地道嘅滷味，氣氛感覺幾好，再加上侍應禮貌都幾親切，加分！最後睇完餐牌，決定試下個二人餐！佢包兩個小食，兩碗例湯，兩碗飯，一碟菜，野飲加$8，同埋佢地最有名既鵝肉！！都好抵食個餐。整體黎講，可以話好有屋企飯既味道，而且味道唔會太重，因為我通常都好怕出街食會太咸，但呢到剛剛好。佢最好食一定係鵝肉唔使講，肉質鮮美多汁，同埋感覺好新鮮。整體黎講我會俾90分，值得一試，而且我會返去再食😝