HAHA CHICKEN 하하치킨 (西九龍中心)

營業中

休息中

前幾日同朋友傾開計，大家都好想食韓國嘢，之後我就醒起西九龍中心間樂樂豬手都幾好食，朋友話好想食埋炸雞，所以就分頭行事，一人去買一間。呢間炸雞店有成七種口味咁多，而且套餐仲包一碗飯同一款飲品，性價比都幾高。我地就叫咗兩個餐試下，揀咗最經典嘅甜辣炸雞同埋最邪惡嘅辣芝士炸雞，而飯方面有兩款，有卡邦尼飯同埋安東雞飯，好貪心咁想試曬兩款，就每樣要咗一碗，飲品就以罐裝飲品同埋紙包飲品為主。炸雞即叫即炸，夠曬熱辣辣，一份有三件雞，仲有兩件年糕伴碟，入口皮脆肉嫩，而且仲係無骨啖啖肉，真係夠曬滿足，甜辣味辣度唔會好辣，想挑戰味蕾就一定要試下辣芝士炸雞！另外仲叫多咗半隻芝士炸雞，未食已經聞到陣陣芝士香氣，成舊雞都沾滿芝士粉，味道鹹香突出，食到停唔到口。卡邦尼飯同埋安東飯滿滿醬汁，配料都幾充足，細細碗又唔會太飽。