岩盤牛扒ミディアムレア ステーキ (Greenery Plaza ) (已結業)

今日同朋友去食呢間專食鐵板牛扒既餐廳叫medium rare，佢既特別之處係可以自己揀牛扒既份量，有三種部位可以揀，分別係肉眼，牛柳同埋西冷，由300g起。牛扒可以揀唔同既醬汁，分別係蔥油，洋蔥油同蒜油,另外可以加配套餐。咁我地就揀左400g左右既肉眼同牛柳配蒜油再升級套餐.餐廳環境偏向日式,位置都幾舒服.等左一陣就有得食。食呢類型鐵板牛扒最怕就係塊鐵板唔夠熱，佢地既鐵板就好夠熱，牛扒表面好香脆, 上面有少少蒜片,加埋一齊食唔洗醬汁都好好食。塊牛柳真係值得一讚，肉質好tender，好有牛肉味。呢個份量都係140蚊，鐘意食牛肉既真係要試下！