板長壽司 (已結業)

來板長吃晚餐，要食飽的話$300都未必落到樓，所以計落都只吃過一兩次﹗咁岩今日同工友在淘大搵食，見佢門口貼住午市套餐$42，見幾抵食就入去試試﹗點了壽司烏冬餐。先來三式壽司，分別是三文魚、蟹棒及鐵火卷，睇住水吧即叫即做，是平日吃到的堂食份量，新鮮，亦好吃﹗吃過壽司，再來的是麵豉湯烏冬，湯頭濃郁，烏冬雖不是什麼上乘貨，但已算不錯﹗最後仲有雜錦天婦羅拼盤，三件野菜，當中一件是大蝦，熱辣辣，蝦身大隻亦爽，好味﹗配埋餐茶或麵豉湯，食物種類多，亦新鮮好吃，呢個餐都算係抵食，如晚餐散叫的話我估要接近$100，值得推介﹗