香港粉麵 (已結業)

疫情期間，午餐一般都係附近餐廳買外賣，通常係大概＄40至$70嘅飯盒連飲品，今日唔想食飯，就喺附近搵吓粉面店。呢間香港粉面應該開咗兩三個月，前身嘅九龍粉面我都幫襯過幾次，今次又終於試吓呢間新店。餐牌上嘅粉面30幾蚊，門口擺着個牌話有午餐特價推介， $29 ，今日有麻辣雞河粉，鯪魚球河粉，仲有另外一個不過唔記得咗係乜。我就揀咗鯪魚球河，個湯底係清湯，好處係唔口渴，但如果鍾意濃味嘅就要揀麻辣或者牛腩嗰啲。大大碗，大大舊鯪魚球，河粉同埋湯分開，唔會浸到淋晒。鯪魚球幾好味，仲送咗一大舊白蘿蔔同埋生菜。老實講， $29真係好抵食，其實我覺得佢可以收貴幾蚊……環境感覺好乾淨，都食得放心嘅，店員亦都好有禮貌，比我慢慢揀食物有介紹有乜抵食好食。一定會再幫襯嘅！