六十六十火鍋 (已結業)

趁住天氣仲有少少乍暖還寒， 我哋又乘機出動去打邊爐啦， 之前有同事介紹長沙灣六十六十火鍋， 二百零蚊包一個湯底和八款海鮮同六款火鍋配料， 仲要唔使加一，好似幾吸引咁一於揾日去試下。呢度提供三款湯底選擇， 我哋就揀咗蕃茄濃湯底脆米泡飯套餐， 圖中海鮮係二人份量， 非常足料大份， 有鮑魚 肉蟹 貴妃蚌 鮮魷 蠔同貝類等， 全部相當新鮮， 最欣賞係肉蟹， 肉質厚實，啖啖肉好鮮甜又多膏， 另外貴妃蚌超級肥美， 浸泡落蕃茄湯度更顯得嫩滑鮮甜味道一流。食完海鮮之後，跟住輪到火鍋配料出場， 肥牛就一定唔少得， 其餘都係大路食物如粟米 響鈴 魚皮餃 蟹柳等，最驚喜係萵筍， 雖然不是貴價菜，但平時好小食到， 呢樣我幾鍾意食，口感清甜爽脆唔錯。清晒枱面嘅食物之後，跟住店員會為我哋加入白飯同油渣脆米，白飯完美吸收海鮮同肉類湯底的精華， 呢個泡飯真係好出色好美味。200元就可以收穫一頓豐富美食，好味又抵食，呢餐飯真係滿足愉快呀！