潮食街 (已結業)

上年都食過一次潮食街，食物質素唔錯。見到訂座有優惠，就同屋企人嚟慶祝生日。呢晚主題係「蠔」食海陸自助晚餐，不過潮食街不嬲都有蠔。全晚比較特別係「自家製紅燒BB乳鴿」，非一般好食，多汁肉嫩，成世人食過最好食嘅乳鴿。不過食咗幾round就變咗沙薑雞，要食趁早。另外好味推介係燉湯。上次嚟都有食，結論係不論咩湯都一定正。足料又甜，屋企煲嘅都冇咁正。牛肋扒我試都唔敢試。見到師傅切落去咁吃力都知好食極有限，我知自己啲牙利唔過把刀，留俾其他食客啦。其他海鮮類普普通通，長腳蟹算甜，生蠔正常，青口差過火鍋放題。熱食類普遍一般。餐廳送咗生日蛋糕，雖然一早知呢度蛋糕普通，但都覺得好有心思。三人埋單1000多少少。可以食足三個鐘，樣樣試少少，合格有餘。