越味皇 (已結業)

夏天熱辣辣，有時無胃口食飯個陣我地都會去食越南湯粉，有湯嘅粉麵開胃啲而且更容易入口。我地直接揀左餐廳推薦嘅一人套餐($62)，包沙律、單拼粉麵同冷熱飲品一杯。男友則單叫左一碗蟹膏湯濛同一份牛油雞翼。一人餐前菜我地叫左越式酸辣鳳爪沙律，味道醒胃，鳳爪份量比想像中多而且無骨，啖啖肉好岩懶人食。牛骨清湯豬頸肉湯濛牛骨湯好清無咩油，面頭放有大量金不換令湯底更香，濛粉食落頗為爽口。豬頸肉比較油同濕，無左種香烤的口感，本身肉味不足調味亦都唔太夠，不過不失。蕃茄湯底非常濃郁，仲有陣陣蟹膏香，食落非常之開胃，好岩夏天食。牛油蒜蓉雞翼雞翼即叫即炸，上枱個陣仲係熱辣辣，每隻嘅size到有返咁上下大，所以幾抵食。外皮炸到脆卜卜好香口，入面就仍然保持juicy嫩滑。牛油味香濃比較特出，鍾意食蒜嘅我覺得如果蒜味再多啲會更加好味。