長旺餐館

營業中

休息中

平日食一個Lunch起碼都要40蚊，係旺角呢個鬧市，有一間我食左幾年都重係唔洗40蚊包飲品既餐廳，就係起旺角熟食市場入面既餐廳。呢到大部份餐廳都好平，不過今日唔想食咁飽，所以就幫襯左車仔麵。今日係平日，攞左假出黎行街，搞到差唔多3點先黎食Lunch，呢間車仔麵份量Ok，幼麵份量偏少，我叫左魷魚，鴨腎同埋瑞士雞翼，瑞士雞翼有兩隻，好夠味，鴨腎好林，味道都好鮮，魷魚正常味道都新鮮爽口既。另外簡左咖哩湯，咖哩味唔濃，微辣，都Ok。最抵讚係33蚊包飲品係可以簡汽水既，出面買一罐點都要幾蚊啦！屋企人叫左油麵，份量比較多同埋飽肚，如果好肚餓既建議可以試油麵，唔太餓既幼麵食完都有5成飽既。另外舖頭收銀+廚師們都無帶口罩既，如果好介意衛生既建議要三思。