爺爺雞煲皇 (美景街) (已結業)

今日公司要我放工前到土瓜灣巡舖，咁難得有機會，當然約定住附近的朋友到土瓜灣食晚餐，朋友二話不說話想去爺爺雞煲皇食雞煲，就一於咁決定。店舖設計得好明亮，感覺醒神，價錢仲好大眾化，朋友果然無介紹錯。這裏有幾款唔同雞煲（麻辣、花彫酒煮、進補米酒）選擇，仲有川味魚煲，同其他鍋底選擇，另外仲有很多不同的配料。朋友見到隔離枱條魚好豐富，就話不如食秘製川味魚煲，我就無所謂，雞煲魚煲都想食。於是就叫了秘製川味魚煲，一掀起蓋就香味四溢，帶有少量麻辣味。而魚煲好豐富一黎到已經放有金菇、豆卜等吸味的配菜，越滾越入味。而主角條魚就上枱前師傅已經煎香兩面加入上湯及配料，份量好大，魚味細膩，入口嫩滑，只得一條主骨，沒有草腥味，明乎其實大件夾抵食。手切肥牛雪花紋好靚，而且有濃郁的牛味，入口即溶，必食之選。特選黑豚肉味道濃厚，入口爽脆。羊肉片嫩滑，入口細膩。手打四寶丸有牛丸、蝦丸、鯪魚肉丸和墨魚，粒粒彈牙，入面還有粒粒肉粒，誠意之選。自家製響鈴是現炸的，上枱時仍有餘溫，放入魚煲肉微微吸味，脆中帶魚湯味。爺爺冰豆腐一開始就放入魚煲肉煲，好香豆味，好吸味，是魚煲的最佳配搭。皇帝菜、翠肉瓜入口好脆好嫩。