Hot Pot 熱‧海鮮火鍋私房菜

營業中

休息中

今次嘅2人火鍋套餐叫咗沙嗲豬骨湯底，本身有少擔心會唔會太油，但佢香得嚟又唔會話好油膩，加埋一陣花生香，完美地襯托出火鍋的各種食材。佢仲要係真材實料咁有兩大舊豬骨，愈煲愈濃味，食到最後都冇話會變清湯，咸辣適宜。然後叫咗手切安格斯牛小排，厚身足料，唔似出面切薄片比你，放入口乳香味十足，肉質鮮嫩，油花分佈都幾好，每啖都有明確嘅肉香，唔會話唔知自己食咗啲咩。美中不足可能係份量上面可以再多啲（因為食得唔夠喉）。另外追加咗佢嘅新鮮牛肉，雖然冇安格斯牛小排咁驚豔，但都有咬口，但記得唔好淥太耐，如果唔係就會破壞咗口感㗎喇！雜菇拼盤的種類豐富，絕對唔係敷衍行貨（尤其是我呢啲鍾意食菇嘅人），菇菇吸收哂沙嗲湯嘅精華，令人食指大動。我自己就大推菇拼盤多過蔬菜拼盤。仲有大大推沙冰都係勁抵，套餐送兩杯真係擔心餐廳會蝕本。呢度嘅服務態度亦都非常熱情好客，真係落單都令人覺得好親切（諗到香港地咁有人情味真係買少見少）。而且餐廳的環境乾淨衛生，空間寬敞，讓人用餐時倍感舒適，值得一試。