六十六十火鍋 (已結業)

前排聽朋友講話呢間火鍋好掋食，質素又唔錯，於是就諗住試下。之前上網睇過下，見到好多人去食，所以今次就一早打去book定位。去到既時候見到門口已經貼住滿座，好彩有一早訂枱！呢度有三款海鮮火鍋套餐揀，每個餐都會包八款海鮮同六款配料。我同朋友就揀左蕃茄濃湯脆米泡飯套餐，海鮮就揀咗鮑魚、扇貝、肉蟹、蠔、海蝦同鮮魷，同埋有兩款指定貝類。鮑魚同扇貝都幾大隻，食落好鮮甜。啲貝類一啲沙都冇，亦好有鮮味。蠔份量都幾多。而鮮魷就好彈牙。上海蝦嘅時候，侍應用個蓋琴住啲海蝦同我地講啲蝦好生猛，落嘅時候小心佢跳出來。然後我打開個蓋，啲蝦真係仲識郁，想跳出黎咁，證明真係好新鮮。而我最鍾意食嘅肉蟹配番茄湯底真係一流，完全係襯托到肉蟹嘅鮮甜，仲有少少膏，正！食晒啲海鮮其實已經好飽，六款配料我哋嗌左美國肥牛、娃娃菜、炸魚皮、午餐肉、墨魚丸同牛丸。最後我同朋友都飽到食唔哂，所以我哋索性叫佢唔使比飯我地。但係用佢最後打完邊爐嘅湯黎煮個泡飯一定好好食好鮮甜，因為係聚集左咁多款海鮮嘅鮮味。下次嚟我一定要預留個肚食埋個泡飯！