京林屋 (已搬遷) 新店位置

上星期日去希慎行街, 行到六樓見到一間好日系既食肆, 突然有股沖入去既衝動, 因為之前响糖街榮記食完車仔麵仲好肚餓, 兼且近排喜好甜品. 時間係中午1點多, 唔駛等位而入面只得3成入座率, 心諗d嘢好唔好味架, 價錢絶對係唔平架, 不過既然佢打正 "KYOTO" 旗號, 應該唔會差得去邊既.一打開menu, 就比”香港限定~芭菲”吸引, 總之有抹茶雪糕就係我杯茶, 其後叫多個“法式聖馬克抹茶蛋糕”, 大約等3-5分鐘, 兩款甜品都到齊, 一到當然要相機食先啦…香港限定芭菲 ($98) – 個抹茶雪糕同响京都食既差唔多, 抹茶味勁香濃, 蕨餅同白玉同佢就最夾, 紅豆好香軟, 中層既蛋糕口感好得意, 唔覺食蛋糕咁, 而最底層類似大菜糕既就最敗筆, 無乜味道兼雪糕流唔到落去, 所以我食到最後放棄咗.法式聖馬克抹茶蛋糕 ($88) – 無論蛋糕定雪糕配搭, 我都覺得好滿意. 蛋糕有多種口感同層次, 面既焦糖唔似出面焦糖布丁硬崩崩, 而係為整件蛋糕點睛, 少少爽脆襯托蛋糕鬆化, 入口即溶既感覺好正, 而旁邊雪糕, 紅豆同白玉同樣好味, 唔駛幾分鐘已消化咗整碟甜品, 絶對值得推介 !一定會再嚟架,