京林屋 (明宮閣) (已結業)

非常抹茶控嘅我去到太古見到一間叫做《京林屋》，之前食過其他分店，今次試吓呢一間新開張嘅京林屋。餐廳裝修簡約，多以木為主，而且門面非常開陽，入到去店員就安排我哋坐沙發嘅位置。餐牌上實在太多選擇，每一款都好想試吓。首先就叫咗熱食嘅抹茶蕎麥麵，麵嘅顏色係綠色，果然係用抹茶製造而成。食落去同其他麵好唔同，煙煙靭靭嘅口感非常特別。之後就開始食甜品。首先當然叫我最鍾意嘅抹茶半月布丁同埋香港限定芭菲。抹茶布丁好有質感，放上枱都彈下彈下，好得意，食落去抹茶同牛奶嘅味道剛剛好，唔會太苦，又唔會太甜。而芭菲綠茶雪糕真係非常正，食落去軟綿綿嘅口感，而且非常絲滑嘅雪糕，再加埋入面嘅小丸子同埋脆可可片一齊食，非常滿足呀。抹茶卷蛋糕食落去非常鬆軟新鮮，中間仲有抹茶味cream，再配以紅豆、小丸子同埋綠茶雪糕，好有份量啊。最後每人叫咗一杯飲品，分別係桃味焙茶同埋抹茶牛奶可以濕濕口。最後食咗咁多野都只係四百幾蚊，而且全部都係來自日本最出名嘅抹茶系列，咁高質素嘅日式甜品，我哋下次要再試過其他食物。