麵屋豚豚拍子 x 辛味屋 (已結業)

同朋友睇完戲好肚餓，即刻搵野食～佢話食過呢間拉麵🍜唔錯，帶我黎試下。拉麵有十款咁多！之前佢食過札幌味噌招牌牛油拉麵，話好味。今次佢就話揀個札幌味噌雜錦拉麵，咩都有啲～有蟹棒、叉燒、豬軟骨同半隻溏心蛋，重有啲粟米同昆布。我試左豬軟骨，軟骨位好多，啱晒我呢啲鍾意骨膠原既人😏🤪蛋做得夠溏心，有蛋香，正！麵質如果有得揀硬身少少就好喇。食既時候加少少七味粉湯底更香👍🏻湯底用左味噌、豬骨、昆布、洋蔥等熬製，香濃得黎唔會過鹹，食完即唔覺口渴。跟餐重可以揀一款小食，揀左煎餃子🥟，雖然唔係脆卜卜，但夠熱辣辣，入面有啲椰菜豬肉，點埋醋食去掉油膩感。除左拉麵🍜，重有咖哩飯🍛、便當🍱、麻婆豆腐飯同壽喜燒！我地揀左牛肉壽喜燒鍋定食，跟烏冬或者飯，入面有幾片肥牛、兩舊硬豆腐、娃娃菜、金菇，重有隻蛋另外上，唔洗幾分鐘個鍋就滾，啲野食熟晒，撈飯一流！最後重加左個小食～燒多春魚，好味！少少脆，加啲檸檬汁食去腥又好開胃！兩個餐都可以加$3叫熱飲或者$5叫凍飲。