阿夫利拉麵 (The ONE)

營業中

休息中

有時我自己會好唔小心咁對號入座，見到係飲食集團營運嘅餐廳就覺得應該唔會差，唔係飲食集團營運嘅就不會抱期望，其實咁樣真係唔多公度。首先，其實都有試過某些飲食連鎖質素參差已經唔係新鮮事，同時間，又無明文規定話唔係飲食集團整嘢就唔一定好食。所以，我這種耐唔耐會出現嘅心態真係自己都覺得唔好。就好似I.T旗下嘅餐廳，J.S. Foodie我已經鍾意到極點，佢哋唔算係飲食集團(會唔會其實都算係呢🤔因為佢哋潮界嘅形象太鮮明，我無當佢哋係飲食集團)，但質素非常有保證。啱啱去咗The One i.t. 嘅 @afuri_hongkong ，喂，真係好唔錯喎，碗拉麵嘅水準基本上不比市場上我食過嘅差，甚至乎好過其中一兩間開到用圍都係嘅連鎖拉麵店！另外嗌咗碟炸雞(無影相)，好啱我口味，食落唔會有某啲韓式炸雞感覺上咁熱氣。第一幅相係一個素Gyoza，亦都好出色。食呢一餐其實係未夠鐘食晚飯，行過見到諗住入嚟試一試，見到佢哋裝水嘅玻璃樽有品牌「阿夫利」三隻字，樣樣出品都好，喜出望外！真係要搵次正餐再來試多幾樣其他出品。