一番風味 (已結業)

週四晚突然有靚女約去跳舞，與情人o既約會只好縮短，晚飯地點亦改為喺小肥公司附近一家新店「一番風味」度急速進行。店子門面看似細小，但其實延伸往後方o既面積頗大。店內牆身簡單以黑白o既香港舊照裝飾，又真係幾有風味喎！散座木造o既餐桌配有厚墊椅櫈，最舒適當然係先到先得o既卡位。細佬因要趕下場而有感理虧，點菜好自然地就交由honey作主，佢就揀咗個差不多每位網評都大讚o既招牌蟹粥、炒牛柳粒同桶蠔。寫好餸，哥哥仔隨即換上合適o既食蟹餐具。日式鵝肝炒牛柳粒（$88）：伴上軟潤o既鵝肝粒炒煮，鬆軟o既牛柳粒食落更為鮮濃，實有畫龍點睛之效。薑蔥炒桶蠔（$128）：煲仔上o既桶蠔熱力十足，肥美潤滑，以薑蔥炒製香口惹味。招牌糕蟹粥（$328）：主角蟹粥原煲上，香氣撲鼻，新鮮滾熱辣，兩個人食好似有少少誇，不過可以話俾大家聽要食哂係冇難度o既。橙黃色o既粥底入面真係有成隻糕蟹喺入面，絕對足料。招牌糕蟹粥鮮甜香濃，實屬必吃推介也，大家真係咪走寶！「一番風味」o既招牌蟹粥鮮味十足，小炒菜式亦顯風味，如果有啤酒提供，相信食客會食得更為開懷。